په بلخ ولایت کې د غالیو یو شمېر تولیدونکي وایي، چې په دغه ولایت کې د غالیو صنعت یو ځل بیا د نړیوالو بازارونو پام ځان ته را اړولی او صادرات یې د پام وړ ډېر شوي دي. د شمال زون د غالیو تولیدونکي او صادرونکو د ټولنې مسوول عمادالدین محمدي رسنیو ته ویلي، چې د روان ۱۴۰۴ کال په لومړیو شپږو میاشتو کې له افغانستان څخه له ۵۰۰ زرو څخه زیات متر مربع غالۍ بهرنیو هېوادونو ته صادرې شوې دي. نوموړی زیاتوي، چې د بدیلو صادراتي لارو په موندلو سره اوس افغانۍ غالۍ په مستقیمه توګه نړیوالو بازارونو ته استول کېږي او د پاکستان له لارې د صادراتو اړتيا کمه شوې ده.
