د روغتیا نړیوال سازمان (ډبلیو ایچ او) خبر ورکړی، چې له افغانستان سره جاپان ۲۴۰ زره ډالره نوې مرسته کړې ده. یاد سازمان په خپره کړې خبرپاڼه کې ویلي چې دا مرستې به له ښځو او ماشومانو سره د مرستې په ګډون د بېړنیو اړتیاوو د پوره کولو لپاره ولګول شي. په افغانستان کې د روغتیا نړیوال سازمان استازي اډوین سینیزا سالوادور د جاپان د حکومت له مرستو مننه کړې او ویلي یې دي چې دا مرستې د هغو کسانو د درملنې او پالنې لپاره خورا مهمې دي چې پر نشو روږدي دي. درې ورځې وړاندې د سویډن حکومت هم، له افغانستان سره شپږ میليون ډالره مرسته وکړه. تر دې وړاندې د افغانستان لپاره د ملګرو ملتونو د باور ځانګړي صندوق له افغانستان سره د ايټاليا د مرستې خبر هم ورکړی و.
