د لوړو زده کړو وزارت په خپره کړې خبر پاڼه کې ویلي، چې د کابل پولي تخنیک پوهنتون څخه د ۱۴۰۴ هـ ش کال په اوږدو کې له لېسانس او ماسټري پروګرامونو څخه څه باندې ۱۰۰۰ کسان فارغ شوي دي. د فراغت په مناسبت جوړه شوې غونډه کې د لوړو زده کړو او عدلیې وزیرانو، د مرکزي پوهنتونونو رئیسانو، د پولي تخنیک پوهنتون رهبري، استادانو، فارغو شویو محصلینو، د دوی کورنیو او ګڼو مېلمنو ګډون کړی و. د لوړو زده کړو وزیر، مولوي نداء محمد ندیم، فارغو شویو محصلینو ته وویل چې د فراغت سند یوازې یو کاغذ نه، بلکې یو مسؤلیت دی. نوموړي له فارغینو وغوښتل، چې د خپلې څانګې سره سم کار وکړي او که توان ولري، زده کړو ته په فوق لېسانس کې دوام ورکړي. هغه زیاته کړه، چې وزارت هڅه کوي پوهنتونونه له نظري بڼې عملي پړاو ته بوځي، څو محصلین لابراتوارونو او عملي زده کړو ته لاسرسی ولري.
