په امریکا کې د سخت ژمني توپان له امله د الوتنو بهیر ګډوډ شوی او څه باندې ۱۵۸۱ الوتنې لغوه او له ۶۸۰۰ ډېرې نورې ځنډېدلې دي. د الوتنو د څار ویبپاڼې «فلایتاویر» د معلوماتو له مخې، تر ټولو ډېر اغېزمن هوايي ډګرونه د نیویارک جان اېف کنیډي، لاګارډیا او نیویارک لیبرټي دي. هوايي شرکتونو کې «جیټبلو» تر ټولو ډېرې الوتنې لغوه کړې دي. د امریکا د هواپېژندنې ملي اداره خبرداری ورکړی چې ژمنی توپان به د هېواد په بېلابېلو سیمو کې د سختې واورې او سېلابونو لامل شي.
