د افغانستان د فوټسال ملي لوبډله د اسلامي هېوادونو د یووالي سیالیو په لړ کې سبا د مراکش پر وړاندې د خپلې درېیمې لوبې لپاره ډګر ته ښکته کېږي. دغه لوبه به د کابل په وخت د غرمې په ۱۱:۳۰ بجې د ریاض په کوربهتوب ترسره شي. افغان لوبډلې تر دې مخکې په خپله لومړۍ لوبه کې تاجکستان ته د ۹ـ۵ ګولونو په توپیر ماتې ورکړې او په دویمه لوبه کې یې له ایران سره ۲ـ۲ مساوي اعلان شوه. د مراکش ملي لوبډلې هم له ایران سره لوبه ۲ـ۲ مساوي کړې او تاجکستان ته یې د ۷ـ۱ ګولونو په توپیر ماتې ورکړې دي. که افغانستان سبانۍ لوبه وګټي، نو په مستقیم ډول به د سیالیو بل پړاو ته لار ومومي.
