د خوست ولایت د کرنې ریاست مسوولینو خبر ورکړی، چې سږ کال په دغه ولایت کې ۳۱۲ ټنه د املوکو حاصلات راټول شوي دي. د مسوولینو په خبره په دغه ولایت کې پر ۶۹ هکتاره ځمکه املوک کرل شوي، چې ترې ۳۱۲ ټنه حاصلات راټول کړل شوي او دغه شمېر د تېر کال په پرتله ۲۰ سلنه زیاتوالی ښي. د سرچینې په خبره، د املوکو د حاصلاتو زیاتوالي اساسي لامل مناسب اقلیمي شرایط، د باغونو ښه مدیریت او بزګرانو ته د کرنیزو پوهاوي پروګرامونو په لاره اچول په ګوته کړي دي. د یاد ریاست مسوولین زیاتوي، چې د راتلونکي کال لپاره د املوکو د کر، پالنې او ساتنې په برخه کې به بزګرانو ته لا ډېرې اسانتیاوې او روزنیز پروګرامونه برابر کړي، څو د دې مېوې تولید او کیفیت نور هم لوړ شي.
