په کاناډا کې لس کسه د چاړو په ګزار وژل شوي دي. د کاناډا پولیس وایي چې ددغه هېواد په یوه لرې پرته سیمه کې په بېلو برخو کې ۱۰ کسه د چاکو په ګزار وژل شوي او ۱۵ نور ټپیان دي. ویل کېږي چې دوو بریدګرو دغه چاره ترسره کړې ده او هر ځای کې چې څوک په مخه ورغلي په چاکو یې وهلي دي. ددې بریدونو اصلي موخه روښانه نه ده خو پولیس وایي په اړه یې پلټنې پيل کړې دي. امنیتي کسان وایي چې د دوو مشکوکو کسانو پلټنه یې پيل کړې ده. د کاناډا لومړي وزیر دا پېښه بوږنوونکې او خورا وحشیانه بللې ده.
