د ننګرهار ولايت د کانال شرکت مسوولین وایي، د دغې ادارې اړوند له خرما بڼ څخه به سږ کال څه باندې ۲۰ ټنه خرما راټوله شي. د ننګرهار کانال شرکت وياند سيدهمايون غریبمل وايي، د دغې ادارې د هډې فارم په ۴۰ جریبه ځمکه د خرما بڼونه جوړ شوي دي. هغه زیاته کړه، دغه ۴۰ جريبه خرما باغ کې ۲۷۰۰ د خرماو بوټي کرل شوي دي .د هغه په خبره، د دغه بڼ ترڅنګ هلته په ٢٥ جریبه نوره ځمکه هم د خرما بڼ جوړ شوی چې اوس پکې شاوخوا زر ونې کېنول شوي دي. دی وايي، د خرماو همدې لوړو حاصلاتو اوس په دغه ولايت کې زیات هېوادوال او پانګهوال لېواله کړي چې په خپلو ځمکو د خرما بڼوڼه جوړ کړي. د ننګرهار د کانال ادارې تر چتر لاندې د خرما د دغه بڼ سربېره د مالټو او زیتونو پراخ باغونه هم شته چې هر کال زرګونه ټنه حاصلات ترې راټولېږي.
