د لوګر د سوداګرۍ او پانګونې خونې مسوولینو ویلي، چې په روان لمریز کال کې له دغه ولایت څخه د ۸ میلیارده افغانیو په ارزښت بهرنیو هېوادونو ته تازه مېوې او سبزیجات صادر شوي دي. د مسوولینو په خبره د اوبو مهارول او کروندګرو ته د دولتي ځمکو په اجاره ورکول د صادراتو د زیاتوالي لامل کېږي. بل پلو ځینې سوداګر وايي، چې ډېره برخه صادرات یې پاکستان ته دي، خو په هېواد کې د مېوو حاصل راټولولو پرمهال د لارو تړل کېدو له امله له سختو ستونزو او مالي زیانونو سره مخ کېږي. دوی له سرپرست حکومته د بدیلو لارو او بازارموندنې په برخه کې د همکارۍ غوښتنې لري.
