د ملګرو ملتونو د کډوالو عالي کمیشنرۍ په خپله اېکس پاڼه په یوه لیکلي بیان کې ویلي، چې په افغانستان کې یې لسګونو بې ځایه شویو او له ګاونډیو هېوادونو اېستل شویو کډوالو ته دایمي سرپناوې جوړې کړي دي. په بیان کې ویل شوي، چې یاد سازمان په ۲۰۲۴ کال کې ۱۹۰ دایمي سرپناوې جوړې کړي دي .د بیان له مخې، یاد شمېر سرپناوې د افغانستان په مرکزي سیمو کې جوړې شوي دي، چې په جوړېدو سره یې د بې ځایه شویو کسانو د اوسېدو ستونزې حل شوې دي. د ملګرو ملتونو د کډوالو عالي کمیشنرۍ زیاته کړې، چې دغه کورونه او سرپناوې د جاپان په مالي ملاتړ او د وطن موسسې په فني همکاریو سره جوړې شوې دي. دا په داسې حال کې ده، چې دغه سازمان تر دې وړاندې په جوزجان ولایت کې هم ۱۱۱ کورنیو بې ځایه شویو ته دایمي سرپناوې جوړې کړي دي.
