د ایران د کورنیو چارو وزیر اسکندر مومني په تازه څرګندونو کې ویلي، چې د کډوالو د اېستلو ستونزه د دوی د پرله پسې راتګ له امله ده او د مخنیوي لپاره یې له افغانستان سره په پولو کې د دیوالونو د جوړولو کار په چټکۍ سره دوام لري. نوموړي په ټینګار سره ویلي، چې له افغانستان سره د پولې تړل د کډوالو د تنظیمولو د پلان یوه برخه ده چې په کې فزیکي، الکترونیکي او نظري بندول شامل دي. هغه زیاته کړې، د پولو د تړلو او د استوګنې له اسنادو پرته د کډوالو د کار د مخنیوي بهیر د خلکو او کارګرانو په همکارۍ ښه پرمختګ کړی دی. د ایران اسلامی جمهوریت دغه چارواکی په داسې حال کې د کډوالو د اېستلو د پلان اعلان کړی، چې د دغه هېواد چارواکو د استوګنې له اسنادو پرته د افغان کډوالو د اېستلو بهیر ګړندی کړی دی.
