د امریکا د ولسمشرۍ ټاکنو د دوو نوماندانو لومړنۍ مناظره نن وشوه. د امریکا کورني مسایل د مناظرې په اول کې شامل وو. د ۲۰۲۰م کال په جنوري کې پر کانګرس د لاریونوالو یرغل، د امریکا اقتصاد، د دندو پیدا کول، ټولنیز او صحي خدمات هغه مسایل وو چې بحث پرې وشو او دواړو نوماندانو د هرې یوې برخې لپاره یو بل په ناکامیو او بې مسوولیتیو تورن کړل. پخواني ولسمشر ډونالډ ټرمپ، ولسمشر جوبایډن له افغانستانه د امریکا د وتلو په برخه کې چې ده د امریکا د تاریخ تر ټولو شرمناکه شېبې وبللې په بې غورۍ او ناکامۍ تورن کړ. ولسمشر جوبایډن بیا د ټرمپ دا تورونه بې ځایه وبلل او ویې ویل چې په حقیقت کې ټرمپ د دغو ټولو ګډوډیو مسوول دی، ځکه د ده په خبره په خپل وخت کې یې د ګڼو مسایلو په اړه څه ونه کړل. په دې مناظره کې چې شاوخوا نوي دقیقې وه دواړو نوماندانو له سر تر پایه په یو بل کلکې نیوکې وکړې او په پیل کې یې په لاس یا خبرو سره روغبړ هم ونه کړ.
