د بریتانيا د دفاع وزیر بن والاس وایي، په افغانستان کې د دوی د ځانګړو ځواکونو د ناوړه کړنو په اړه څېړنې، چې تېره مارچ میاشت کې پیل شوې وې، اوس اساسي پړاو ته رسېدلي دي. د فرانس پریس خبري اژانس د راپور له مخې، والاس دغه څرګندونې د بریتانيا پارلمان ته په لیکلې وینا کې کړي او هغه منلې چې څېړنه د دوی پر ځانګړو ځواکونو د پورې شویو تورونو په تړاو ده. د بریتانيا د ګارډین ورځپاڼې د راپور له مخې ښایي د بریتانيا ځانګړو ځواکونو د ۲۰۱۰ او ۲۰۱۳ کلونو ترمنځ موده کې شاوخوا ۸۰ افغانان له محکمې پرته وژلي وي. په افغانستان کې د ناټو په مشرۍ د نړیوال پوځي ماموریت د یو شمېر نورو غړو هېوادونو سرتېري هم په جنګي جنایتونو تورن شوي دي.
