د عامې روغتیا وزیر نورجلال جلالي د خصوصي روغتونونو پر مسوولینو غږ کړی چې د روغتیايي خدمتونو کیفیت لوړ او د درملنې لګښتونه راکم کړي، څو ناروغان وکولی شي په مناسبه بیه غوره روغتیايي خدمتونو ته لاسرسی ولري. نوموړي د خصوصي روغتونونو د اعتبار ورکولو او درجهبندۍ د بهیر د پایلو د اعلان په غونډه کې ویلي، چې خلک له ګڼو اقتصادي ستونزو سره مخ دي او د درملنې لپاره بهرنیو هېوادونو ته سفر کول هم له ستونزو سره مل دي؛ له همدې امله خصوصي روغتونونه باید د درملنې د لګښتونو او د خدمتونو د کیفیت په برخه کې د خلکو اړتیاوو ته جدي پاملرنه وکړي. جلالي د خصوصي روغتیايي سکټور پر رول د ټینګار ترڅنګ ویلي، چې دغه سکټور د عامې روغتیا وزارت مهمه برخه ده او وزارت پرې باور لري.
