د ملګرو ملتونو د بشري مرستو د همغږۍ دفتر (اوچا) وايي، په افغانستان کې د ماشومانو د ګوزڼ یا پولیو د تایید شویو پېښو شمېر ۳۶ ته رسېدلی او د دې ناروغۍ د له منځه وړلو هڅې روانې دي. اوچا د دوشنبې په ورځ، د تلې په ۲۷مه، په خپل راپور کې ویلي، افغانستان د نړۍ له هغو دوو هېوادونو څخه دی چې د پولیو ویروس لا هم پکې شته. د راپور له مخې، د پولیو د مخنیوي او له منځه وړلو لپاره د بشري مرستندویه بنسټونو په ملاتړ د سپټمبر په ۲۱مه په ټول هېواد کې د واکسیناسیون کمپاین پیل شو. په دې کمپاین کې تر پنځو کلونو کمعمره څه باندې ۱۲.۷ میلیونه ماشومان تر پوښښ لاندې نیول شوي دي. د اوچا په وینا، د دغه کمپاین موخه د پولیو ویروس د خپرېدو د خطر کمول او د ماشومانو ساتنه ده. د راپور له مخې، د افغانستان په سوېلي او ختیځو سیمو کې د پولیو ډېرې پېښې ثبت شوې دي.
