د ترکیې پولیسو په ادرنه او قیصریه ښارونو کې په جلا جلا عملیاتو کې ۵۸ افغان او پاکستاني کډوال د دغه هېواد خاورې ته د ناقانونه ننوتلو په تور نیولي دي. په قیصریه کې څلور نور کسان هم کډوالو ته د جعلي اسنادو جوړولو په تور نیول شوي دي. د ترکیې رسنیو راپور ورکړی چې په ادرنه ښار کې د تلاشیو پر مهال ۲۷ افغان او پاکستاني کډوال نیول شوي دي. د راپور له مخې، دغه کسان له اداري پړاوونو وروسته د کډوالۍ ادارې ته سپارل شوي دي. په قیصریه ښار کې هم امنیتي ځواکونو ته له ترکیې څخه بهر ته د کډوالو د لېږد لپاره د جعلي اسنادو د کارولو په اړه د معلوماتو له ترلاسه کولو وروسته، د مالاتیا پر لوري غځېدلي لوی سړک عملیات کړي دي.
