د کندهار ولایت د ښاروالۍ مسوولینو خبر ورکړی، چې د دغه ښار د حلقوي سړک د جوړولو چارې له تېرو ۸میاشتو راهیسې روانې دي او تر اوسه یې شاوخوا ۴۵ سلنه کار بشپړ شوی دی. دغه سړک څه باندې ۹ کیلومتره اوږدوالی او ۴۰ متره سور لري. د ویالو، پلچکونو او د سړک د یوې غاړې د اساسي طبقو جوړول بشپړ شوي او ټاکل شوې، چې ډېر ژر یې د بېس کورس طبقې د جوړولو چارې پیل شي. د سړک د دویمې غاړې ډېره برخه هم کیندل شوې او د ویالو جوړولو کارونه پکې روان دي. د دې سړک په بشپړېدو سره به د کندهار ښار ترافیکي ګڼهګوڼه کمه، د موټرو تګ راتګ اسانه او د ښاري پراختیا بهیر چټک شي.
