د ملګرو ملتونو سرمنشي انتونیو ګوترېش د ۲۰۲۷ کال د وړاندیز شوې بودجې د وړاندې کولو پر مهال، د دغه سازمان په افغانستان کې د مرستندوی ماموریت (یوناما) د ۶۰ بستونو د کمولو وړاندیز کړی دی. ګوترېش د ملګرو ملتونو د عمومي اسامبلې پنځمې کمېټې ته په وینا کې، د افغانستان په اړه د خپلواک څېړنیز میکانېزم د فعالیتونو د پراختیا لپاره د ۳.۲ میلیونه ډالرو اضافي بودجې د ځانګړي کولو وړاندیز هم کړی دی. د نوموړي په وینا، دغه بودجه به په ۲۰۲۶ کال کې د یاد میکانېزم د لومړي پړاو له پیل وروسته، د فعالیتونو د پراختیا، د اضافي بستونو د برابرولو او نورو عملیاتي اړتیاوو د پوره کولو لپاره ولګول شي.
