د ملګرو ملتونو پراختیايي پروګرام (یو اېن ډي پي) وايي، په افغانستان کې یې د تېرو نږدې څلورو کلونو په ترڅ کې د لمریزې برېښنا ۹.۸ مېګاواټه ظرفیت رامنځته کړی دی. دغه بنسټ ویلي، دا ظرفیت د ۲۰۲۳ کال له جنورۍ څخه د ۲۰۲۶ کال تر سپټمبر پورې د «سیسها» پروګرام له لارې رامنځته شوی، چې له امله یې د هېواد په کچه ۸۰۰ روغتیايي او ښوونیزو مرکزونو ته پاکه او باوري برېښنا برابره شوې ده. د ملګرو ملتونو پراختیايي پروګرام په وینا، په دغو مرکزونو کې ۶۲۱ ښوونځي، ۱۵۴ روغتیايي مرکزونه، ۱۸ د ولسوالیو روغتونونه او اووه ولایتي روغتونونه شامل دي. افغانستان، په ځانګړي ډول په لرې پرتو سیمو کې، د برېښنا له محدود لاسرسي سره مخ دی او د لمریزې انرژۍ کارول د روغتیايي او ښوونیزو مرکزونو لپاره د برېښنا د برابرولو له مهمو لارو څخه بلل کېږي.
