د کانونو او پټرولیم وزارت د پالیسۍ او برنامو معین شیخ الحدیث عبدالرحمن قانت د ایران د بهرنیو چارو وزارت د اقتصادي ډیپلوماسۍ له مرستیال حمید قنبري سره کتلي دي. د کانونو او پټرولیم وزارت په خپره کړې خبرپاڼه کې ویلي، چې په دې کتنه کې د دواړو هېوادونو ترمنځ د اقتصادي اړیکو پر پیاوړتیا، ښه ګاونډیتوب، د کانونو په برخه کې د پانګونې پر فرصتونو او د هرات ـ مزارشریف د اوسپنې پټلۍ پر پروژې خبرې شوې دي. په خبرپاڼه کې زیاته شوې چې دواړو لورو د افغانستان او ایران ترمنځ د اقتصادي همکاریو د لا پراختیا په اړه هم بحث کړی دی. د دغه وزارت د پالیسۍ او برنامو معین ویلي، افغانستان د کانونو، په ځانګړي ډول د نفتو او ګازو پراخې زېرمې لري او وزارت کورنیو او بهرنیو پانګهوالو ته د پانګونې لپاره مناسب چاپېریال برابر کړی دی.
