د افغانستان کرکټ بورډ خبر ورکړی، چې د ۱۹ کلنو کرکټ لوبډله به د ۲۰۲۶ کال اسیا جام سیالیو ته د چمتووالي په موخه د بنګلهدېش او عمان د ۱۹ کلنو لوبډلو پر وړاندې د ۷ یو ورځنیو لوبو په لړۍ کې ګډون کوي. د مهالوېش له مخې، افغان ځوانان به د اکتوبر په ۱۰مه عمان ته سفر وکړي او د همدې میاشتې له ۱۳مې تر ۲۳مې پورې به د بنګلهدېش پر وړاندې پنځه یو ورځنۍ لوبې ترسره کړي. له دې وروسته به د اکتوبر په ۲۷مه او ۳۰مه د عمان د ۱۹ کلنو لوبډلې پر وړاندې دوه نورې لوبې وکړي. دغه سیالۍ د ۱۹ کلنو اسیا جام لپاره د افغان لوبغاړو د چمتووالي په موخه ترسره کېږي، چې ټاکل شوې د نومبر په لومړیو کې د عمان په کوربهتوب پیل شي.
