د بدخشان د کلیو، بیارغونې او پراختیا ریاست مسوولینو ویلي، د واخان ولسوالۍ له بروغیل سیمې د چین تر پولې پورې د ورېښمو لارې ستراتېژیک سړک، له پنځو کلونو وروسته بشپړ شوی او ډېر ژر به ګټې اخیستنې ته وسپارل شي. د مسوولینو په وینا، دغه سړک ۱۲۱ کیلومتره اوږدوالی او له اوو تر لسو مترو پورې پلنوالی لري، چې د درېیو لویو پلونو او لسګونو پلچکونو جوړول هم پکې شامل دي. د دې پروژې چارې د ملي بودجې له لارې د ۳۶۵ میلیونه افغانیو په لګښت بشپړې شوې دي.
