د امریکا د بهرنیو چارو وزیر، مارکو روبیو، ویلي چې واشنګټن به له ایران سره په روانو مذاکراتو کې د فارس خلیج هېوادونو امنیتي او ستراتیژیکې ګټې په پام کې ونیسي.د راپورونو له مخې، روبیو د کویټ د سفر پر مهال د خلیج هېوادونو متحدانو ته ډاډ ورکړی چې امریکا به له تهران سره په خبرو اترو کې له خپلو خلیجي شریکانو سره بشپړه همغږي وساتي او هغوی به د مذاکراتو له پرمختګونو او پرېکړو خبر کړي. نوموړي ټینګار کړی چې امریکا به داسې هېڅ اقدام ونه کړي چې د خپلو متحدانو امنیت ته زیان ورسوي. د روبیو دا څرګندونې وروسته له هغې کېږي چې د امریکا ولسمشر ډونالډ ټرمپ په سپینه ماڼۍ کې د ناټو له سرمنشي مارک روټه سره د لیدنې پر مهال ویلي وو چې د امریکا او ایران ترمنځ مذاکرات «ډېر ښه روان دي».
