د لوړو زده کړو وزارت وزیر، مولوي نداء محمد ندیم، د ننګرهار پوهنتون د ۲۲۰۰ محصلینو د فراغت په مراسمو کې د ګډون پر مهال فارغانو ته سپارښتنه وکړه چې د تخصص او لا زیاتو زده کړو ترلاسه کولو ته دوام ورکړي. نوموړي وویل، اسلامي امارت د مسلکي کادرونو جذب او هغوی ته د کاري فرصتونو برابرولو ته ژمن دی. هغه له فارغانو وغوښتل چې خپله پوهه او وړتیا د هېواد د ابادۍ او د ولس د هوساینې لپاره وکاروي. په دغو مراسمو کې د ننګرهار والي، ولایتي او نظامي مسؤلینو، د پوهنتون مشرتابه، استادانو، علماوو او د فارغانو د کورنیو غړو هم ګډون کړی و. د یادونې وړ ده چې سږ کال د ننګرهار پوهنتون د ۱۲ پوهنځیو له بېلابېلو څانګو څخه ۲۲۰۰ محصلین فارغ شول او د فراغت سندونه یې ترلاسه کړل.
