د عامې روغتیا وزارت خبر ورکړی چې د پکتیکا ولایت په ګیان او برمل ولسوالیو کې د شاوخوا ۴۵۰ زره امریکایي ډالرو په لګښت د دوو روغتیایي مرکزونو د جوړولو چارې بشپړې شوې دي. سرچینې ویلي، چې یاد مرکزونه د عملیاتو له مجهزو خونو، عصري طبي وسایلو، د ګرموالي منظم سیستمونو او برېښنايي اسانتیاوو سره سمبال دي. دا پروژې د پکتیکا د عامې روغتیا ریاست د هڅو او د ملګرو ملتونو د کډوالو عالي کمېشنرۍ( یو این ایچ سي ار) په مالي ملاتړ جوړې شوې دي. د دغو مرکزونو په پرانیستلو سره به د ګیان او برمل ولسوالیو اوسېدونکي له اساسي او معیاري روغتیایي خدماتو څخه برخمن شي.
