د ملګرو ملتونو د بشري استوګنې پروګرام (یواېن هیبېټاټ) راپور ورکړی، چې له ۲۰۲۳ کال راهیسې تر اوسه څه باندې پنځه میلیونه کسان افغانستان ته راستانه شوي دي. په راپور کې راغلي، چې د راستنېدونکو د شمېر زیاتوالی په افغانستان کې د نفوسو د چټک زیاتېدو لامل شوی او د مېشتېدنې، ښاري خدمتونو او بنسټیزو اسانتیاوو په برخه کې یې نوې ننګونې رامنځته کړې دي. د راپور له مخې، ټاکل شوې ده چې ملګري ملتونه نن په باکو کې په یوې غونډه کې افغانستان ته د بېرته ستنېدونکو د ادغام او ملاتړ لپاره د همکارۍ پر څرنګوالي خبرې وکړي. راپور زیاتوي چې افغانستان ته د کډوالو پراخه راستنېدنه د نړیوالو او کورنیو بنسټونو ترمنځ د لا زیاتې همغږۍ اړتیا نوره هم ډېره کړې ده.
