د ازبکستان د خصوصي پانګونې او سوداګرۍ خونې مشر، دوران وهابوف، د یوه پلاوي په مشرۍ په بامیان ولایت کې له والي قاري ګلحیدر شفق سره کتلي او د کرنیز سکټور د پراختیا، پانګونې او د کچالو د تولید او پروسس په برخه کې یې د ګډو همکاریو پر پراخېدو ټینګار کړی دی. د بامیان ولایت د رسنیو دفتر له خوا په خپره شوې خبرپاڼه کې راغلي، چې په دې کتنه کې د ازبکستان د سفارت مرستیال بهادر قدیراف هم ګډون درلود. دواړو لورو په یاد ولایت کې د اقتصادي همکاریو د پراختیا، د کرنې په سکټور کې د پانګونې د جلب او د کاري فرصتونو د رامنځته کېدو په اړه خبرې کړې دي. د ازبکستاني پلاوي مشر ویلي، چې هېواد یې د کرنې، په ځانګړي ډول د کچالو د تولید او پروسس په برخه کې په بامیان ولایت کې پانګونې ته چمتو دی.
