د هوايي چلند د نړۍوالې ادارې د راپور له مخې، د ایران له جګړې وروسته د افغانستان له فضا د الوتنو شمېر د پام وړ زیات شوی، او دا مهال هره اونۍ شاوخوا دوه زره الوتکې د هېواد له هوايي حریم څخه تېرېږي. د راپور له مخې، دغه شمېر د تېر کال په پرتله نږدې پنځه برابره زیاتوالی ښيي، چې له امله یې د افغانستان عواید هم په څرګند ډول لوړ شوي دي. اوسمهال افغانستان له هرې الوتکې څخه ۷۰۰ ډالره حقالعبور اخلي، چې پر بنسټ یې په اونۍ کې شاوخوا ۱.۴ میلیونه ډالره عاید ترلاسه کوي. د کلني عاید کچه بیا له ۷۰ میلیونو ډالرو څخه اوښتې ده. کارپوهان وايي، هوايي شرکتونه په عملي ډول بدیلې لارې نه لري، ځکه له اروپا څخه اسیا ته د الوتنو مسیرونه محدود شوي دي.
