د هیواد پخواني ولسمشر حامد کرزي، د پاکستان له خوا د هیواد پر بېلابېلو سیمو د هوايي او ځمکنيو بریدونو په غبرګون کې ویلي، چې دا بریدونه د افغانستان پر حاکمیت ښکاره تېری او د نړیوالو اصولو او مقرراتو څخه سرغړونه ده. هغه د شهیدانو کورنیو ته د تسلیت او خواخوږۍ څرګندولو ترڅنګ یو ځل بیا ټینګار کړی، چې پاکستان دا مهال د خپلو بېفکره او غیرمنطقي سیاستونو د ناوړه پایلو سره مخ دی او نه شي کولی چې د افغانستان پر ولس په برید کولو ځان له دغو ستونزو خلاص کړي. ښاغلي کرزي زیاته کړې، چې پاکستان باید پوه شي چې د افغانستان ټول ولس د خپل وطن او خاورې په دفاع کې د هر بهرني یرغل پر وړاندې سره یو موټی او یو غږ دي. پخوانی ولسمشر دغه راز د خبر داري په بڼه ویلي، چې د پاکستان خیر په دې کې دی چې له تجاوز او شخړو تېر شي او خپلو تاواني سیاستونو ته بیا له سره کتنه وکړي.
