د کابل ښاروالۍ مسوولینو ویلي، چې د دولسمې ناحيې اړوند سیمو کې یې غصب شوې زرغونې سیمې او پلې لارې بېرته راګرځولې او دغه لړۍ دوام لري. د ۱۲ مې ناحیې مسوولین وایي، په دې وروستيو کې په زرغونو سیمو او پلولارو کې د غاصبينو لسګونه ناقانونه تاسيسات ويجاړ او پاک شوي او دا لړۍ به تر هغه دوام وکړي، چې غصب شوې سيمې په بشپړ ډول بېرته نه وي ترلاسه شوې. د مسوولینو په خبره زرغونې سیمې او پلې لارې عام ملکیتونه دي او هېڅ چاته اجازه نه ورکول کیږي چې شخصي ګټه ترې واخلي. دا په داسې حال کې ده، چې لاهم د کابل ښار په بېلابېلو سیمو کې ډېری پلې لارې د هټیوالو لخوا بندې دي او ښاریانو ته یې ستونزې جوړې کړې دي.
