د کډوالو او بېرته راستنېدونکو او د سرحدونو، قومونو او قبایلو چارو سرپرست وزیران د یو پلاوي په ملتیا له تورخم ښارګوټي څخه د ليدنې پرمهال ويلي چې د راتلونکي پسرلي له پیل سره به راستنو شویو افغانانو ته د استوګنې او کرنیزو ځمکو وېش پیل شي. د کډوالو او بېرته راستنېدونکو چارو سرپرست وزیر ویلي، له اړونده وزارتونو سره په ګډه د راستنېدونکو افغانانو د ستونزو په حل کې په اقدام بوخت دي او هڅه کوي، چې د راتلونکې پسرلي له پیل سره به راستنو شویو افغان کډوالو ته د استوګنې او کرنیزو ځمکو وېش پیل شي، چې له پخوا په دې برخه کې لا ډېر کار شوی. دغه راز د سرحدونو او قبایلو چارو سرپرست وزیر ویلي، د سرپرست حکومت بهرنۍ پالیسي ډېره واضحه ده او غواړي خپلو ټولو ګاونډیانو سره ښې اړیکې ولري.
