د میدان وردګو ولایت د طبیعي پېښو پروړاندې د مبارزې ریاست مسوولینو خبر ورکړی، چې د دغه ولایت په جلریز ولسوالۍ، تکانه سیمه کې د سېلاب ځپلو لپاره یو ښارګوټی جوړ شوی دی. د یاد ریاست د مالوماتو له مخې د خیراباد په نوم دغه ښارګوټی د سرپرست حکومت د مشرتابه د حکم پر اساس چې ۷۵ کورونه پکې دي، په دولتي ځمکه د ډي.آر.سي. مؤسسې په مالي ملاتړ په اساسي ډول جوړشوی دی. په دغه ښار ګوټي کې د هرې کورنۍ لپاره درې د اوسېدو خونې جوړې شوې او د ټولو توکو په درلودلو سره ګتې اخیستنې ته سپارل شوی دی. د یادولو وړ ده چې کابو شپږ میاشتې وړاندې د یاد ولایت په بېلابېلو ولسوالیو کې د سېلابونو له امله لسګونه کسانو ته ځاني او مالي زیانونه واوښتل او په سلګونه کورونه یې هم ویجاړ کړي وو.
