د جوزجان ولایت په ولایتي روغتون کې د ۴۰ میلیونه افغانیو په لګښت یو شمېر نوې څانګې جوړې شوې دي. دمالوماتو له مخې په یاد روغتون کې د انتاني ناروغیو څانګه، عاجله څانګه، د لفټ سېستم، د پایوازانو خونه، د معلوماتو څانګه او د فیس ورکړې څانګه جوړه او ګټې اخیستنې ته سپارل شوې ده. د عامې روغتیا وزارت مالي او اداري معین ویلي، چې دغه نوې څانګې په دې روغتون کې د یاد ولایت اوسېدونکو ته د غوره روغتیايي خدمتونو په موخه جوړې شوې دي. د یاد وزارت د چارواکو په خبره دوی د جوزجان ولایت په لرې پرتو سیمو کې هم د روغتیايي خدمتونو د وړاندې کولو په موخه زیات پلانونه لري، تر څو هېڅ هېوادوال له روغتیايي خدمتونو بې برخې پاتې نه شي.
