د تاجکستان، قرغزستان او پاکستان د برېښنا وزیرانو د کاپ۲۸مې غونډې په څنډه کې له افغانستان څخه غوښتي چې د برښنا د لېږد په کاسا۱۰۰۰ پروژه کې فعاله ونډه واخلي. د کاسا۱۰۰۰ پروژه هغه پلان دی چې له مخې به یې له تاجکستان او قرغزستان څخه ۱۳۰۰ مېګاواټه برېښنا افغانستان او بیا پاکستان ته رسېږي او ۵۶۲ کیلومتره له افغانستان څخه تېرېږي. په همدې حال کې د افغانستان د اوبو او برېښنا وزارت چارواکي وايي چې په افغانستان کې د کاسا۱۰۰۰ د برېښنا د لېږد پروژې ۵۰ سلنه کار بشپړ شوی او د دې پروژې د بیا پیل لپاره هڅې روانې دي. د دغه وزارت ویاند مطېع الله عابد وايي، د دې پروژې د عملي کېدو لپاره طرحه کابینې ته لېږل شوې، څو یې د خصوصي سکټور پر مټ عملي کړي او په خبره یې، ۴۵ میلیونه ډالره ګټه یې افغانستان ته رسېږي.
