د افغانستان د چاپېریال ساتنې ملي ادارې پر خپله اېکس پاڼه په یوه لیکلي بیان کې ویلي، چې د ژمي له راتګ سره د ښارګوټو او لوړپوړیزو ودانیو مسوولین دنده لري چې خپل د تودولو سیسټمونه برقي یا ګازي جوړ کړي. یادې ادارې په دې خپاره کړي بیان کې ویلي، چې د کابل ښار د هوا د ککړتیا د مخنیوي لپاره یې په ګڼ مېشتو سیمو، لوړپوړیزو ودانیو او ښارګوټو کې د خبرتیا لپاره څه باندې ۲ زره اطلاعیې خپرې کړې دي. دغه اداره زیاتوي چې د دوی څارونکي شپه و ورځ د کابل ښار په ټولو برخو کې د هوا د ککړتیا سرچینې څاري او له سرغړوونکو سره به یې قانوني چلند وشي. دا په داسې حال کې ده، چې په دې وروستیو کې د کابل هوا، ډیره زیاته ککړه شوې او له بلې خوا موده کیږي چې ورښتونه هم نه دي شوي.
