د افغانستان سرپرست حکومت وایي، ټولې هغه ستونزې چې د ټاپي پروژې پر وړاندې خنډ بلل کېدې، حل شوې او افغانستان د یادې پروژې عملي کېدو ته بشپړ چمتووالی لري. د سرپرست حکومت ویاند وايي، چې که څه هم په افغانستان کې د دغې پروژې پر وړاندې کوم خنډ نشته، خو بیا هم دا د څلورو هېوادونو ترمنځ پروژه ده چې باید ټول ورته چمتوالی ولري. له دې سره هم مهاله د ترکمنستان د انرژۍ د نړیوالو پروژو مسوول مراد ارتیکوف په کابل کې د افغانستان د اوبو او برېښنا له سرپرست وزیر سره په لیدنه کې ویلي چې هېواد یې د ټاپي او په افغانستان کې د برېښنا د نورو پروژو د عملي کولو لپاره چمتو دی. ټاپي پروژه د ګازو نللیکه ده چې له ترکمنستان څخه د افغانستان له لارې پاکستان او هندوستان ته ګاز لېږدوي.
