د بښنې نړيوال سازمان د پاکستان له حکومت غوښتي، د افغان کډوالو د ډله ييزې نيونې، ايستلو او پراخې ځورونې لړۍ دې سملاسي ودروي. د بښنې نړيوال سازمان د یوې خبرپاڼې په خپرولو سره ويلي، د پاکستان حکومت له زرګونو افغان کډوالو څخه د سياسي الې په توګه کار اخلي. د بښنې نړيوال سازمان په تازه خپرې شوې خبرپاڼه کې د دغې ادارې د جنوبي اسيا مرستيالې مشرې ليويا سکارډي له خولې ويل شوي، هېڅوک بايد په ډله ييزه توګه ونه ايستل شي او پاکستان بايد په زوره د بېرته ستنولو په ګډون خپل نړيوال قانوني مسوليتونه په پام کې ونيسي. نوموړې ويلي، که د پاکستان حکومت ژر تر ژره د ايستلو لړۍ ونه دروي دا به د زرګونو افغانانو په ځانګړې توګه د ښځو او نجونو خونديتوب، زدکړو او ژوند ته د لاسرسي مخه ونيسي. د راپورونو له مخې، په وروستیو کې ګڼ افغان کډوال زنداني شوي، ځورول شوي او په تازه راستنېدونکو کډوالو کې یې ځینو ویلي، شتمنۍ هم ترې ګرځول شوې دي.
