په پاکستان کې ځينې افغان کډوالو ویلي چې د کډوالو د ایستلو لپاره د پاکستان د لنډمهالي حکومت له لوري د ټاکل شوي ضرب الاجل له نږدې سره هممهاله، په دغه هېواد کې د افغان کډوالو نیولو هم زور اخیستی دی. د افغان کډوالو په وینا، د کډوالو وضعیت له پخوا ډېر ستونزمن شوی دی. ورته مهال د پاکستان په کراچۍ ښار کې د سرپرست حکومت کونسل عبدالجبار تخاري وايي، د پاکستاني نظامیانو له خوا د افغان کډوالو ځورونه لا هم دوام لري. د نوموړي په وینا، په تېره یوه میاشت کې تر ۱۲۰ زره ډېر افغان کډوال له پاکستانه وتلي دي. بلخوا د کډوالو د حقونو ځیني فعالان ټینګار کوي، چې سرپرست حکومت باید په ګاونډیو او سیمهییزو هېوادونو کې د افغان کډوالو ستونزو ته رسېدنه وکړي. د پاکستان په کراچۍ ښار کې د سرپرست حکومت د کونسل د شمېرو له مخې، اوسمهال څه باندې ۱۰۰۰ افغان کډوال د پاکستان په زندانونو کې بندیان دي او تر ۵۰۰ ډېر نور کډوال له بندخونو ازاد شوي دي.
