د افغانستان د شتمنیو د ساتنې صندوق د مدیره پلاوي یو غړی شاه محمد محرابي وايي هڅه کوي چې د هېواد د اسعاري زېرمو ۳٫۵ مېلیارد ډالره له ګټې سره یې افغانستان ته راولېږدوي. نوموړی ټینګار کوي چې د افغانستان د شتمنۍ هغه ۳٫۵ مېلیارد ډالره چې د نړۍوال حساب د تسویې په موخه د سویس په جینیوا کې په یوه بانک کې ساتل کېږي، د افغانانو د بشري اړتیاو د پوره کولو لپاره په پام کې نه دي نیول شوي. محرابي زیاتوي چې له دغو پیسو هر ډول ترلاسه شوي عواید به د افغانیو د ثابت ساتلو لپاره ولګول شي. د افغانستان د شتمنۍ د ساتنې صندوق د ۱۴۰۱ کال د وږي په ۲۴مه په دې موخه جوړ شو چې د افغانستان د شتمنۍ یوه برخه چې ۳٫۵ مېلیاردې ډالره دي، د سویس په یوه بانک کې وساتل شي او د دغه صندوق د مدیره پلاوي غړي، شاه محمد محرابي ویلي، دغو ۳٫۵ مېلیارد ډالرو تر دې دمه ۱۲۸ مېلیون ډالره ګټه کړې ده.
