د روغتیا نړیوال سازمان وايي، په تېره جون میاشت کې دوی په افغانستان کې یو میلیون او څلورلکه کسانو ته په ټولو ولایتونو کې د ۹۸۵ روغتیايي مرکزونو له لارې بشري روغتیايي خدمات وړاندې کړي دي. په افغانستان کې د روغتیا نړیوال سازمان پرون د افغانستان د ضطراري حالت په اړه په خپل میاشتني راپور کې دغه معلومات خپاره کړي دي. د راپور له مخې، ۲لکه ۸۱ زره ۶۲ نورو کسانو په هغو روغتیايي مرکزونو کې چې د روغتیا نړیوال سازمان یې ملاتړ کوي، اضطراري روغتیايي خدمات ترلاسه کړي دي. ویل شوي په جون میاشت کې ۱۵۷۸ طبي بستې ویشل شوي، چې یو میلیون او ۸ لکه افغانانو ته به یې ګټه ورسېږي. ملګرو ملتونو ویلي، په افغانستان کې دا مهال په ملیونونو کسان روغتیايي خدماتو ته اړتیا لري، په ځانګړي ډول په لیرو پرتو سیمو کې.
