د بهرنیو چارو سرپرست وزیر ویلي چې د افغانستان پر وړاندې د ځينو هېوادونو او نړۍوالو سازمانونو منفي تعامل، دمګړۍ د مثبت کېدو په لور روان دی. نوموړي په یوې غونډه کې زیاته کړې چې د نړۍ هېوادونو په تېرو شلو کلونو او د سرپرست حکومت د نږدې دوو کلونو واکمنۍ په لړ کې له بېلابېلو فشارونو سره بریالي نه شول چې خپلې موخې عملي کړي. متقي همدارنګه ټینګار کړی چې اوس نړۍوالې ټولنې درک کړې چې د افغانستان خاوره د نړۍ لپاره ګواښ نه ده. هغه زیاتوي چې نړۍوال سازمانونه د اقتصادي وضعیت پر ښهوالي، بانکي سیسټم، له نشهيي توکو سره پر مبارزې او په هېواد کې د اداري فساد پر کموالي اعتراف کوي. د بهرنیو چارو وزارت همدارنګه زیاتوي چې دمګړۍ سرپرست حکومت په بهرني سیاست کې بریالی دی او یوځل بیا د نړۍ له هېوادونو سره د سرپرست حکومت د ښو اړیکو غوښتونکی دی.
