سرپرست حکومت وايي، د افغانستان په اړه د مسکو کې په راتلونکې غونډه کې د ګډون بلنه یې ترلاسه کړې ده. د بهرنیو چارو وزارت په یو بیان کې ویلي چې دا بلنه په کابل کې د روسیې سفیر دیمیتري ژیرینوف پرون په کابل کې د بهرنیو چارو سرپرست وزیر ته وسپارله. په بیان کې راغلي په دې کتنه کې متقي هیله څرګنده کړه چې کابل او مسکو به له دې لیدنې د ډيپلوماتیکو اړیکو په چاره کې ښه استفاده وکړي. د بهرنیو چارو وزارت په بیان کې دا یادونه هم شوې چې متقي د روسیې له سفیر څخه د افغان سوداګرو او نورو وګړو لپاره د ویزو په برخه کې د اسانتیاو د راوستو غوښتنه هم وکړه.
