د امریکا په مسیسیپي ایالت کې د توپان له امله ۲۵ تنه مړه شوي او خلکو ته درانه مالي زیانونه هم اوښتي دي. امریکایي رسنیو ویلي چې دا طوفان وړمه ورځ ناوخته د دغه ایالت بېلا بېلې سیمې ځپلې دي. د مسیسیپي ایلالت د بیړني مدیریت ادارې ویلي، د لټون او ژغورنې عملیات د دې ایالت د پلازمینې جکسن ښار شمال شاوخوا ۱۱۰ کیلومترۍ کې په شارکي او همفریز سیمو کې روان دي. د دې ایالت والي د سیمې اوسیدونکو ته خبرداری ورکړ چې د هوا راپورونه وګوري او محتاط پاتې شي. د بیړنیو خدماتو د ادارې یوې چارواکې رسنیو ته ویلي چې اوس مهال اصلي لومړیتوب د خلکو د ژوند خوندیتوب دی.
