کابل کې د ایران سفیر وايي هېواد یې چمتو دی چې افغاني محصولات او مېوې په ښه بیه وپېري او هم له افغان بزګرو سره همکاري وکړي. د بهرنیو چارو وزارت مرستیال ویاند پر خپله ټویټرپاڼه لیکلي چې د بهرنیو چارو له وزیر سره په کابل د ایران سفیر حسن کاظمي قمي، مرستيال يې حسین مرتضوي او مل پلاوي وكتل. سرچینه زیاتوي، د ناستې په پيل کې د بهرنیو چارو وزیر د سرپرست حکومت په وروستیو لاسته راوړنو، سياسي پرمختګونو، تجارتي او اقتصادي وضعيت خبرې وکړې او د ایران هېواد څخه يې مننه کړې چې په ایران کې بند افغان زندانیان يې دوی ته وسپارل او لا يې هم د سپارلو بهير جریان لري. سرچينه كاږي، دغه راز د ایران سفير قمي ډاډ څرګند کړی چې ايران لا زياتـــو همکاریو ته ژمن دی. ده وویل، هېواد يې آماده دی چې افغاني محصولات اومېوې په ښه قېمت وپېري او د زارعت د ودې په برخه کې له افغان بزګرو سره هر اړخیزې همکارۍ ترسره کړي. د سرچینې د معلوماتو له مخې په دې ناسته کې پر ګڼو سیمه ییزو مسایلو سربېره د تجارت په وده او د اورګاډي د پټليو د غځولو په کار کي د چټکتیا په اړه تفصلي خبرې وشوې.
