د افغانستان او قزاقستان تر منځ سوداګري تر تېر کاله درې سوه ميلیونه ډالره زیاته شوې ده. دا خبره پرون د افغانستان د سرپرست حکومت د بهرنیو چارو د وزیر او افغانستان ته د قزاقستان د سفیر تر منځ په کتنه کې شوې. افغانستان ته د قزاقستان سفیر علیم یاسین ګېلديېف د بهرنیو چارو له سرپرست وزیر سره په کتنه کې ویلي چې د دغو دواړو هېوادونو تر منځ سوداګري په تېر یوه کال کې ۹۰۰ مېلیونو ډالرو ته رسېدلي چې د تېر کال پرتله ۳۰۰ مېلیونه ډېره ده. د بهرنیو چارو وزارت ویاند ویلي، دغه قزاق استازي له افغانستان سره د سیاسي، سوداګریزو او بشري اړیکو او مرستو او افغان محصلینو ته د کلنیو بورسیو د ورکړې د دوام ژمنه کړې.
