د هندوستان حکومت د ملګرو ملتونو د خوړو نړۍوال پروګرام له لاې افغانستان سره د ۲۰ زره میټرک ټنه غنمو مرستې اعلان کړی دی. د هند د بهرنیو چارو وزارت لخوا په یوه خپره شوې خبرپاڼه کې راغلي، چې هېواد یې دغه اعلان د افغانستان په تړاو د منځنۍ اسیا هېوادونو له استازو سره په یوه ګډه ناسته کې وکړه. هندي استازي دې ناستې ته ویلي چې د ملګرو ملتونو د خوړو نړۍوال پروګرام له لارې افغانستان سره ۲۰ زره ټنه غنمو مرسته کوي چې د ایران د چابهار بندر له لارې به استول کېږي. سرچینې زیاته کړې چې د ۲۰۲۱ کال په اګست کې د کابل تر سقوط وروسته هند افغانستان سره د ۵۰ زره ټنه غنمو مرسته کړې وه، څو هلته د بشري بحران مخه ونیول شي.
