د افغانستان لپاره د اروپایي ټولنې ځانګړی استازی وایي، کابل ته یې د سفر په ترڅ کې د سرپرست حکومت له چارواکو سره په لیدنه کې هغوی ژمنه وکړه چې له فساد او نشهیي توکو سره به مبارزه کوي. د افغانستان لپاره د اروپایي ټولنې ځانګړي استازي توماس نیکلسون پرون په کابل کې یوه خبري ناسته کې د خپل پنځه ورځني سفر راپور وړاندې کړ. په دې ناسته کې د اروپایي ټولنې سرپرست استازي رافایلا یودیچي هم حضور درلود. نیکلسون ویلي چې اروپايي ټولنه په افغانستان کې د هېڅ ډول وسلهوال مقاومت ملاتړ نه کوي. نوموړي وویل، افغانستان ته په سفر کې یې د دغه هېواد د سرپرست حکومت له چارواکو، سیاسیونو او خبریالانو سره لیدلي دي. د نوموړي په باور د افغانستان د ټولو ستونزو د حل یوازېنۍ لار بين الافغاني خبرې دي او دغه هېواد یوه ټولګډونه حکومت ته اړتيا لري.
