د پکتیا ګمرک مسوولین وایي له پاکستانه افغانستان ته قاچاق کېدونکي ۱۰ ډوله نظامي تجهيزات يې ترلاسه کړي دي. د پکتیا د ګمرک رییس محمد داوود ايوبي وايي چې دغه نظامي تجهيزات تېره ورځ د ډنډپټان ولسوالۍ په ګمرک کې ترلاسه شوي دي. هغه وايي په ترلاسه شوو تجهیزاتو کې څلور ډوله د بېلابېلو وسلو لوی او واړه دوربینونه ۱۲۰ نظامي چانټې ۴۵ د مختلفو ټوپکونو کنداغونه او ۱۲۰ د كلاشينكوف شامل دي. نوموړي وویل چې یاد نظامي تجهیزات د سوداګریزو توکو په يوه باروړونکي موټر کې ځای پرځای شوي وو. ايوبي زیاته کړه د یادو تجهیزاتو د قاچاق په تور یو کس هم نیول شوی او اړوندو ارګانونو ته سپارل شوی دی.
