د امریکا ولسمشر جو بايډن د اوکراین جګړې د لومړۍ کلیزې په مناسبت وینا کې ویلي چې روسیه به هېڅکله اوکراین کې ګټونکې نه شي. بایډن پولنډ کې په خپله وینا کې ویلي چې پوتین د امریکا له اوسپنیز هوډ سره مخ شوی او دا پر اوکراین د روسې یرغل د ناټو غړي تر پخوا لا ډېر متحد کړي دي. نوموړی وايي پوتین ګومان کاوه چې اروپا د روسیې پر تېلو متکي ده خو د ده په وینا اروپايي هېوادونو د امریکا په همکارۍ اوس د روسیې د فوسیلي سونګ توکو بدیل مارکېټونه موندلي دي. د امریکا ولسمشر له دې وړاندې د دوشنبې په ورځ په یوه نااعلان شوي سفر د اوکراین پلازمېنې کیېف ته ولاړ او هلته يې وینا درلوده. نوموړي خپله دا ژمنه هم تازه کړه چې د اوکرایین له مرستې به په شا نه شي.
