د ایران په سوېل کې د فارس ولایت د کازرون ولسوالۍ په تلګوهک کلي کې دوه افغان کارګران د څاه کیندلو پر مهال د زهري ګازونو د تنفس له امله مړه شوي دي. د ایراني خبري اژانس ایلنا د راپور له مخې، پېښه د یکشنبې په ماښام شوې؛ لومړی یو کارګر د څاه په تل کې د زهري ګازونو له خپرېدو وروسته بېهوښه شوی او بل یې د ژغورنې هڅې پر مهال ګاز نیولی دی. راپور زیاتوي، ژغورونکې ډلې له ۱۵ ساعتونو هڅو وروسته د دواړو کارګرو مړي د څاه له ۸۰ مترۍ ژوروالي راایستلي دي. د راپور له مخې، د پېښې پر مهال په څاه کې لا هم زهري ګازونه موجود وو، خو د مړو شویو افغان کارګرو د هویت په اړه جزئیات نه دي خپاره شوي.
